Et se li cue[n]s est pris, molt tres bien le raueres,[1]
Car nos avons de l’or et de l’argent asses.
Jo ne quic pas que Baiges soit oen si osés[2]
Que s’il a pris Renaut, por lui soit vergondé[s]. »
Sire, dist Aalars, qu’esse que dit aves ?
Alons querre Renaut tant que il soit trovés. »
Et respondi li rois : « Si com vos commandes. »
A icestes paroles, es les aceminés.[3]
Or dirons de Renaut ki s’en estoit tornés
Apres le Sarrazin, corant tos abrievés.
Molt le vait encauçant par les tertres quarrés.
Au parmonter d’un pui s’est Renaus escriés :
« Car torne, Sarrazin, tes cevax est lassi[é]s.
Se tu muers en fuiant, molt mal fu ta bontés. »
Li Sarrazins l’oï, si est vers lui tornés,
Et Renaus le feri, ne s’est mie arestés,
Devant, en son escu ki à or [fu] bendés.[4]
Molt fu fors li haubers, quant il n’est desafrés,
Et li paiens vassaux, quant il n’est craventés.
Renaus l’empoint par force, ki molt est adurés ;
Li espiels par le poing est très [c’]au fer colés.[5]
Li Sarrazins le voit, molt est espoentés,
Il guencist le destrier ki estoit poumelés.
Ja ert grant la bataille des vassaus adurés.
Li sire de Tolose fu chevalier proisiés ;
Il a dit [à] Renaut : « Vassal, car me laissies.[6]
Ales ent à Bordiax ; gardes ne vos targies.
Molt sera grant damage se [vos] Baiart perdies.[7]
Jam[a]is por vostre roi si bon ne raueries.»[8]
« Par mon cief, dist Renaus, de folie plaidies.
Qant de moi partirois, ja mais ne serois lies. »
Lors a brocié Baiart des esporons des piés
Et li Turs son ceval ; ne s’est mie atargiés.