Frere, menes Baiart qui tant fait à prisier.
Saint Nicolas i vi à la terre couchier.
Les ymages plouroient chascun en son moustier.
.ii. ours i vi accourre et .i. lion trop fier,
Et prenoient Richart, le mendre chevalier ;
Si le pendoient, sire, à .i. fust de pommier
Il escrioit : Renaut, car me venes aidier.
Vous i aliez, sire, sus Baiart vo destrier.
Dessous vous trebuchoit le bon courant destrier
Ne porrïes l’enfant secourre ne aidier.
Dame, chen dist Renaus, que [teisiez], si m’oes.
Ja ne cresroi en songe pour rien que dit m’aiez.
Par Dieu, chen dist Richars, n’i porteroi mes piez.
Ne moi, chen dist Guichars, de verté le sachiez.
B —Sire, chou dist la dame, ne le voles lessier,
Je ne vous deffenc mie, Sire, que n’i voisies.
El non d’ichel Seignor qui pardonna pechiez,
Qu’il garisse vo cors de mort et d’encombrier
Et vous ramaint à joie en chel palais plenier ;
Car onques nule dame n’ot meillor chevalier,
Tant preu ne tant hardi ne tant fache à prisier.
Ne vous merveillez mie se j’ai de vous pité
Et de vos .ii. enfans qui vous sieent as piés.
Sire, se il vous perdent, tout sont desconseillé.
Anuit songai un songe qui me fait esmaier,
Que g’iere à Montauban le castel droiturier,
Ens en ma cambre à vaute painturée à ormier,
En .i. lit mi et vous par moult grant amistié.
Un aigle vi volant contremont vers le chiel,
Le feste de vo sale brisa en .ii. moitiés ;
Toute la couverture abati à ses piés,
Et prendoit moi et vous, nobilez chevalier,
Et si nous emportoit amont devers le chiel ;
Mais puis li escapamez. De chou fumez irié
Et caïsmez à terre. Si estiez moult blechié ;
Anchois que li vos cors, estoit li miens sor piez,
Si que je vous voloie contremont redrechier.
Si aviez une quisse et lez .ii. bras brisiez.
Je regardai sor destre à .vii. c. chevaliers,
La tour de Montauban si caoit à mes piez,
.i. des maistres quarriaux descendoit sans targier
Et consivoit vo frere Aalart le proisié ;
Le brach à tout l’espaule li faisoit esrachier ;
Li foies, li poumons li paroit par derrier,
Li destre [iex] de son chief li caioit à sez pieés.