L’escarlate li tranche et l’ermin peliçon ;
La chemise de lin ne li fist garisson ;[1]
De la cuise li tranche le plus maistre braon.
Desos lui est chaüs li mules aragons ;
Mais li bers se tint bien, ainc ne mut des arçons.
Aallars s’escria : « Helas ! perdu l’avom.
Mors est li bers Renaus qui iert nostre secors ;
Or ne poons durer que nos mort ne soiom ;
Il n’i a plus ne mains, or nos rendons prison. »
Et Renaus lor escrie : « [Taisies], malvais garçon.[2]
Encor sui sains et saus, si nes pris .i. boton ;
Ains nos vendrons molt chier que nos mort i soion. »
Renaus sailli en piés, li fius au viel Aymon,
Et a prise la lance Fouque de Moreillon ;
De sa cuise l’arache à force et à bandon,
As barbiaus de la lance pendoient li braon.
Molt sofri grant angoise Renaus, li fius Aymon ;
Puis a traite l’espée qui li pent au giron.
A haute vois s’escrie : « Fouques de Morillon,
Se o moi descendes, molt feres que preudon. »
Et Fouques li retorne, iriés comme lion,
Et Renaus le fiert si, li fius au viel Aymon,
De Froberge s’espée qui li pent au giron ;
Tel cop li a doné desor l’iaume reont,
Onques haubers ne hiaumes ne li fist garison.
Trestot le porfendi desi qu’ens el poumon ;
Illuec l’abati mort devant lui el sablon.
Renaus prent le cheval, si monta en l’arçon,
L’escu pent à son col sens nule arestison.
S’or ne s’i gardent Franc, il ont mal compaignon.
Jamais por nul qui soit ne guerpira l’arçon.
Es estriers s’aficha, mais trop li furent cort,
Que li cuirs li alonge, li fers ploie desous
Et estendent les aunes, si froisent li arçon.[3]
Page:Castets - La Chanson des quatre fils Aymon, 1909.djvu/512
Apparence
Le texte de cette page a été corrigé et est conforme au fac-similé.
484
les quatre fils aymon