Puis si a çaint Froberge au senestre giron
Et pendi à son col .i. escu à lion ;
Et monta sor Baiart, le destrier arragon,
Et il li saut avant .xxx. piés el sablon.
Or il fu plus seürs qu’en la tor d’Avignon
N’en dedans Montauban, sus el maistre dongon ;
Et vait ferir Ogier, le nobile baron.
De Broiefort l’abat, ou il vossist ou nom.
Renaus descent à terre, sans nule arestison,
Son cheval amena Ogier le poigneor,
Puis li tint son estrier ; Ogiers monte en l’arçon.
« Cousins, ce dist Renaus, or as tu guerredon
De la roche Mabon où orrains estion.
Tu n’i assaillis mie, tant feïs que preudom.
Selonc celui servise as ci le guerredon.
Mais de tant te tieng je a traïtor felon
C’onques à nul de nos n’i feïs garisson.
Huimais vos i gardes, car nos vos desfiom.
Par icel saint apostre, c’on quiert en pré Noiron,
Ne vos espargnerai, quant hom estes Charlon. »
« Sire, dist li Danois, et nos nos desfendron. »
Seignor, [s]e là fussies desor le pui ancour[1]
Où François assemblerent as .iiii. fius Aymon !
Tante lance i ot fraite, tant escu à lion,
Et tant bon chevalier abatu de l’arçon,
Et Maugis point et broche le destrier arragon,
Et a brandie l’ante, destort le confanon,
[Et va ferir Gaimart en l’escu au lion.[2]
Devant li l’abati trestout mort el sablon.
Puis a traite l’espée qui li pent au giron
Et va ferir en l’elme Fauque de Mongençon ;
Trestout le porfendi desiques el menton],
Puis crie Montauban, clerement à haut ton :
« Feres, franc chevalier, à force et à bandon.
Se Ogiers nos eschape, jamais honor n’aurom. »
Page:Castets - La Chanson des quatre fils Aymon, 1909.djvu/539
Le texte de cette page a été corrigé et est conforme au fac-similé.
511
les quatre fils aymon
