Por chosse k’aie emblée, pendre me doive l’on.
Tant comme Renaus vive ne Maugis li larron,
Ne vos garroit chastiaus, fermeté ne donjon,
Ne perdissies la teste, ce sacies, ains tiers jor. »
Quant Charlemaignes l’ot, si, a pris .i. baston[1]
Et fiert parmi le chief Ricart le fil Aymon.
Le cuir li a trancié et la char li derront,
Li sans li est colés aval sor le menton ;
Et Ricars ne fu mie ne trop fol ne trop lours ;
Ains saisist Charlemaigne par molt fiere vigor,
Et Charles ensement retint bien le baron.
Embedui s’entrabatent enmi le paveillon ;
Ja iert Ricars saillis deseur le roi Charlon,
Quant Ogiers i acourt et li ber Ydelon :[2]
« Avoi, sire empereres, ci a grant traïson.
Certes, n’est pas barnages de batre son prison.[3]
En une autre maniere vos vengies del baron. »
Quant Maugis l’a veü, à poi d’ire ne font.
Isnellement et tost a saisi son bordon ;
A .ii. mains le leva et fiert .i. perron.
Le fer en a brisié et fendu jusqu’enson.
Li frons li est rougis plus que ne soit charbon.
Il entendoient tot à Ricart le baron.
Lors a parlé Maugis à guisse de baron.
« Ahi ! c’or n’iestes ci Renaus, li fius Aymon,
Aallars et Guichars et Baiars l’arragon !
Il ne remansist mie por nul avoir del mont,
Ne vengisom Richart, le chevalier baron. »
« Richart, dist Charlemaignes, de vos nos vengerom. »
« Richart, dist Charlemaignes, trop parles à belloi.
Mau dahait hui ma barbe, se vosvis m’estord[rois]. »[4]
- ↑ 9712 M Quant le roi l’entendi, si saisi .i. baston. A ses .ii. mains le prist par grant aïreson Et fiert. li Comme Kl. l’oï, à poi d’ire ne font, Il s’abaissa à terre ; si a pris i baston.
- ↑ 9721 M Quant Ogier i acourt et le ber Salemon, Huidelon le Bavier, Estout le fix Odon.
- ↑ 9723 B M vasselage.
- ↑ 9738 Sic M. L m’estordoie.