Et Aallart le conte et Guichars l’alossé,
Si l’eüsse sor Sains et plevi et juré
Que je les garderoie desi à l’ajorné,
Si les auroit Maugis ains mie nuit amblés. »
Dist Ogiers li Danois : « Trop aves sermoné ;
Quant plus prieres Charle, mains fera en non Dé.
Au bien ferir des lances nos verres acorder.
Hui montrera l’enfant, qui le volra amer.[1]
Son linage en covient à une part torner,
Et cil qui remanra, de moi soit desfiés. »
Ogiers de Danemarce s’en est issus del tref ;
Estous, li fils Œdon, s’en est o lui tornés,[2]
Richars de Normendie et Torpins l’ordenés
Ydelons de Baiviere est de lor parenté.
Il vestent les haubers, lacent helmes jemés
Et çaingnent les espées as senestres costés.[3]
Bien furent .xv. m. quant furent asamblé.
Ogiers de Danemarche se prent à escrier :
« Or i parra, dans rois, cui l’en feres mener,
Tex le porra conduire, tos iert à mort livrés.[4]
Il n’a si riche prince en tot vostre regné,
Que s’il le maine as forches, qu’il n’ait le chief copé. »
Ogiers, li bons Danois, s’en vint au maistre tré[5]
Et a veü Richart laiens enprisoné.[6]
Les poins avoit loiés et les .ii. iols bandés ;
Tres parmi liu des ongles li raie li sans clers.
Quant Ogiers l’a veü, si comence à plorer ;
Sovent giete la main au bon branc aceré,
Qu’il li voloit les mains et les iols desbander ;
Mais tant doute Charlon qu’il ne l’osse adeser.
Richars apele Ogier : « Biau cousins, çà venes
Et vos Names de France et Torpins l’ordenés
Et Estout le vaillant, Widelon le barbé,
Page:Castets - La Chanson des quatre fils Aymon, 1909.djvu/619
Le texte de cette page a été corrigé et est conforme au fac-similé.
591
les quatre fils aymon
