Page:Castets - La Chanson des quatre fils Aymon, 1909.djvu/624

596

les quatre fils aymon

Se nos l’avions ore et plevi et juré^[1]
Sor le cors saint Blancart de Paris la cité,
Ne vaudroit à Ripeu .i. denier moneé,
Se Richars i est mors, ocis ne afolés,
10385Qu’il ne perde la teste ençois .i. mois passé. »
Tant ont dit à Ogier qu’il lor a creanté
Qu’il n’aura de lui garde, tost l’a aseüré.^[2]
« Ripeu, dist Charlemaignes, or en poes aler.^[3]
Ja mar doterois home qui de mere soit nés.
10390Menes .m. chevaliers garnis et conreés,
Qu’il garderont les forches por Maugis le faé ;^[4]
Que se Renaus i vient, mon droit me maintenes. »
« Sire, ce dist Ripeus, se vos le comendes,^[5]
M 274Je n’en metrai que .c. por coiement aler. »
10395« Ripeus, dist Charlemaignes, or aves bien parlé. »
Li glous vesti l’auberc et a l’elme fermé,
Et a çainte l’espée au senestre costé
Et pandi à son col .i. fort escu listé,^[6]
Et tint .i. fort espié à confanon fermé.^[7]
10400Et salli el cheval c’on li ot apresté.
Adonc li fu Richars maintenant delivrés ;^[8]
Les poins avoit liés et les .ii. oels bandés ;^[9]
Sor .i. mul ambleor ont fait Richart monter.^[10]
Ripeus de Ribemont, li traïtres prové,^[11]

1. 10381 et suite. Texte de B :

   Se l’aviez sor sains et plevi et juré,
   N’i vaurroit à Ripeu i.d. monnaé
   Qu’il ne prenge le teste ains qu’il soit retornés.
   Tant ont dit à Ogier qu’il l’ont asseüré.

2. 10387 Metz : tot.
3. 10388 B or tost, si vous hastez. B ajoute : Alez moi Richart pendre qui qu’en doie peser.
4. 10391 Metz : Qui garderont le camp.
5. 10393 B li glous.
6. 10398-10400 Manquent à B.
7. 10399 Metz : roide espié al.
8. 10401 B li fiex au viel Aymon livrés.
9. 10402 B iche fu Ricardez qui ot les yex bendés.
10. 10403 B Mulet trotier.
11. 10404 Metz : Rispeus de Rispemont li traïtres mortés.

    Ce ms. donne la forme Rispeus.