Ripeu, fai ton plaisir, à Deu nos comendon. »
Et li glous est montés, ferme le chaiaignon
Et sist enson le feste, tot droit en cevauçons.
Por Deu, seignor baron, bien l’aves oï tot,
Que Baiars fu faés, li bons cevaus gascons ;
Si entendoit parole com se ce fust [.i.] hom.
Venus est à Renaut, ens el brueillet reont
Où il iert endormis si com traveilliés hom.[1]
Baiars ne pot parler, ne dit ne o ne non ;
Ains hauce le pié destre qu’il ot gros et reont,
Et fiert l’escu Renaut .i. grant cop à bandon ;[2]
De l’un chief dusqu’en l’autre le peçoie et confont ;
Et Renaus s’esveilla, si sailli contremont.
Il a overt les iols, si garde droit amont
Et a veü son frere ki fu sus l’escaillon.
Quant li ber l’aperçoit, ainc tel dolor n’ot hom ;
Plus tost fu en Baiart que ne vole faucon,
Et li chevaus s’en torne le tertre contremont.
Ainc ne l’estut le jor touchier de l’esperon ;
Au menor saut qu’il fait, .xxx. piés el sablon ;
Ne s’i tenist à vol ostor n’esmerillon.
De la noise s’esveille Aallars le greignor
Et Guichars d’autre part, li fius au viel Aymon ;
En la ceue derriere Amaugis li larron :
A haute vois s’escrie : « Pilates et Noirom,
M’aves vos endormi par vo maleïçon ? »
Lors monte en Broieguerre, son destrier arragon ;
Fors Baiart le Renaut il n’i avoit meillor.
Renaus sist en Baiart qui li cort de randon ;
La bouche porte ouverte, baée contremont.
Ainc ne l’estut le jor toucier de l’esperon ;[3]
Au menor saut qu’il fait, .xxx. piés el sablon.
Si henist et braidist qu’il fait tentir le mont.
Bien le puet on oïr d’une loée lonc.
Page:Castets - La Chanson des quatre fils Aymon, 1909.djvu/632
Apparence
Le texte de cette page a été corrigé et est conforme au fac-similé.
604
les quatre fils aymon