Il resaillent en piés, chascuns par contençon.
Challes a trait Joieuse qui li pent au giron,
Et Renaus tint Froberge qui tranche de randon.
L’empereres de France est en piés relevés
Et tint traite Joyeuse au poing d’or noielés,
Et Renaus tint Froberge, s’a le roi regardé.
Charles crie Monjoie à sa vois haut et cler :
« Se par .i. chevalier i sui pris ne matés,[1]
Dont ne [doi] rois je estre ne corone porter. »[2]
Quant Renaus l’a oï, si s’est molt vergondés.
« Hé Dex ! ce dist li dus, qui me fesistes né,
Ja est çou Charlemaignes à cui je ai josté,
Ki norri mon linage et tot mon parenté.
Je ne parlai à lui bien a .xx. ans passés.
J’ai forfait le poing destre dont je l’ai adesé.
Ja li iert devant lui maintenant presantés ;
Si en face mes sires toute sa volenté. »
Il tint nue Froberge et son escu bouclé,
Et vint à Charlemaigne, au pié li est alés.
Par les piés le saisist et prent à acoler.
« Sire, ce dist Renaus, merci por amor Dé,
Qui en la sainte Virge se daigna aombrer.
Sire, dones moi trives, tant qu’aie à vos parlé. »
« Or tost, dist Charlemaignes, conte moi ton pansé.
Je ne sai qui tu ies, mais molt ses bien joster. »
« Sire, ce dist Renaus, Dex en soit aorés. »
Il a jointes ses mains vers Charlon l’aduré :
« Merci, frans empereres, por icele pité
Que Dex ot en la crois, quant il i fu penés,
- ↑ 10895 P Se par .i. chevalier sui ne pris ne matez.
- ↑ 10896 L Dont ne rois je estre. — Ces belles pages allaient au cœur de tous les auditeurs du trouvère. Charles est bien le prince chevalier qui combat au premier rang de ses hommes. Il nous rappelle le portrait que Joinville fait de Louis IX à la Mansourah : onques si bel armé ne vi ; car il paroit dessus toute sa gent, dès les épaules en amont, un heaume doré en son chief, une espée d’Alemaigne en sa main. Quant à Renaud, se reprochant d’avoir désarçonné son suzerain, se jetant à ses pieds, prêt à se sacrifier pour les siens, se refusant à riposter au terrible coup de Joyeuse, courtois, loyal, ami fidèle, le bon vassal par excellence, il réalise l’idéal de l’homme d’honneur de son temps.
