Et vos, Renaut, meesmes, si aures m’amisté.
Si vos rendrai vos terres et vos grans yretés
Et acroitrai del mien bien .xiiii. cités,
Se vos voles tant faire con vos dire m’orres. »
« Sire, ce dist Renaus, et car le me nomes. »
« Volentiers, dist li rois, ne vos iert plus celé.
Vos me rendres Maugis, vo cousin naturel,
Certes que je has plus que nul home mortel. »
« Sire, qu’en feries ? » ce dist Renaus li ber.
« Certes, jel vos dirai, dist li rois honorés.
Je le ferai molt tost par la geule encroer,
Et quant li glous iert mors et à sa fin alés,
A keues de chevaus le ferai traïner
Et les membres del cors .i. et .i. desmembrer.
En charbon le ferai ardoir et embraser
Et la poldre cueillir et jeter en la mer.
Quant tot çou aurai fait que vos ai devisés,
Si set tant li diables engiens et fausetés,
Puis eschaperoit il, qu’il iert si atornés. »
« Feriez le vos issi ? » ce dist Renaus li ber.
« Oïl, ce a dit Charles, si me garisse Dés. »
« Dont n’en prendries vos ne chastel ne cité
Ne nul avoir del mont por Maugis acuiter ? »
« Nenil, dist Charlemaignes, c’om me peüst doner. »
« Par foi, ce n’iert donc ja, ce dist Renaus li ber ;[1]
Et sachies une chosse voirement sans fauser :
S’or avies Aallart en vo prison geté
Et Richart et Guichart que je doi molt amer,
Certes, ains les lairoie à martire livrer
Et les membres del cors .i. à .i. desevrer,
Que rendisse Maugis, mon cousin l’aduré. »
« Vasals, dist Charlemaignes, dont soies desfiés,
Que ja voir autrement n’i seres acordés.
Or reprenes vos armes et de moi vos gardes. »
« Sire, ce dist Renaus, de çou sui je irés,
- ↑ 10980 sq. Dans la branche suivante (v. 12828 sq.) Renaud refuse encore de rendre Maugis, mais en termes moins rudes et avec une éloquence émue. Les circonstances sont d’ailleurs différentes.
