La menue gent crient à grande descepli[n]e ;[1]
Charle vont maudisant et sa terre et s’orine.
Toz jorz vont destraignant que lor dolor ne fine.
Cascun jor en muert tant, à si grant discipline,
C’on en fist un carnier lez la porte perrine ;
Laienz furent rué sanz messe et sans matine.
Quant Renaus l’a veü, à poi qu’il ne s’acline.
D’ire et de maltalent li cuers li esgratine,
Et Richars li escrie à sa voiz enterine :
« Por Deu, frere Renaut, mar vi vostre covine.
Se j’en fusse creüs, par la grant loi devine,
Charle eüsse pendu ou ars en feu d’espine,
Ou al mains fust il mis en no grant tor perrine.
Pieça eüssons pais et ferme et enterrine,
Et si ne fust pas morte cele gent orfenine
Ne portez en carnier ne jetez à rapine.
Hé las ! por quoi les plaing, por sainte Katerine ;
Je i serai ja mis, bien le sai et devine,
Et vos, Renaut, beax frere, ce iert grant discipline,
Et ausi ert ma dame o la blance poitrine,
Et Allars et Guichars, cui je aim d’amor fine.
Tuit i morronz à honte, à molt poi de termine.
Ha Maugis ! où es tu, por la sainte Roïne ?
Se tu fusses o nos, en ceste tor perrine,
Assez i eüssiens pain et vin et cuisine
De cele au roi plus bele, ki n’en eüst corine,
Mais or morrons de faim, comme leu n’a rapine,
Que Charles nos het plus que la gent sarrasine. »
La famine commence et tos jors lor [enforce][2]
Et Charles fu dehors entre lui et sa force.
Molt manace Renaut et tos jors s’en esforce.
Pendus sera ou ars ou tuez d’une croce,
Et Richars traïnez, n’i vaudra rien sa force.
De Allart, de Guichart fera il froides noces,
Puis manda ses barons, de venir les anforce :
Et il i sunt venu devant son tref, el porce.[3]
