Li baron s’en alerent, si s’en sunt departi.
Mangoniax ont fait faire, maint en i ont basti ;
Devant les pavellons en ont maint arrami.
Ainz n’i ot .i. sol prince ki de fief fust saisi,
N’en eüst .ii. ou .iii. amenez devant li.
Charlemaigne en ot .x. ki primes sunt basti.
Tot entor Montalban, si com il ont hordi,[1]
Drecierent mangoniax, si com avez oï,
Et nuit et jor ruerent, car le roi le volt si.
Là dedenz Montalban en ont maint malbailli,
Les maison[s] abatirent, maintes gens ont blesmi.[2]
En Montalban la vile i oïsiez maint cri[3]
De femes et d’enfanz, ne sevent où foïr.
Bien parut là dedenz, tant i avoit anui,[4]
Maufé i conversaisent, diable ou enemi ;[5]
Car tel noise i avoit et tel bruit et tel cri
Des pierres ki ceoient, ke l’en i a jali.[6]
Mainz plora son neveu et avœc son ami,
Et mainte bele dame regrete son mari,
Ki fu ferus de pierre ou de quarrel bruni.[7]
Encor par desus ce estoient malbailli
Que tote la vitaille lor est issi failli
Et as uns et as autres, dont il sunt malbailli.
Il muerent à dolor et de faim sunt pali.
Or comence li criz, li delz et la tristece ;[8]
Cascun jor en muert tant de fine secerece ;[9]
Li carnier sunt enpli qu’il n’i a mes largece
Où l’en peüst pas metre une garbe de vece.
Quant or le voit Renaus, molt en a grant destrece.
« Ha Dex ! ce dit li dus, perdu ai ma leece
- ↑ 13287 A si com il est ordiz. M il est ourdi.
- ↑ 13291 L maison. M Lor mesons lor abatent, moult en i ont.
- ↑ 13292 M Par trestoute la vile oïssiez moult grant cri.
- ↑ 13294 M qu’i avoit moult ennui.
- ↑ 13295 M manque.
- ↑ 13297 M manque.
- ↑ 13300 M ou de gal consievi.
- ↑ 13305 M le cri, le duel et la destraiche.
- ↑ 13306 L en i muert. M en muert tant.
