[Rohars] lo fist premiers, bien lo sai par ma foi,[1]
Ains .i. sol n’en nomma, ançois dist par derroi
Que l’un en apeloit orendroit sanz celoi ;
Ains .i. seul n’en nomma, se Jhesus m’en port foi.
Lor gages en livrerent dedens la main lo roi.
Li autre de deffendre, sans dire « ce ne voi »,
[Aymonet et Yon que ameduez ci voi,[2]
Redonerent les lor ici droit devant moi,
C’onquez Renaus lor pere n’avoit fait tel desroi].
Si est tout d’une chose, non pas de tot par soi.
Por ce lo ge, seignor, bien lo di endroit moi,
Que tuit voissent ensamble, com se fust .i. tornoi. »[3]
Adonc parla [Renaus] com hom de grant derroi :[4]
« Molt a bien dit li dus, [vertés] est endroit soi. »[5]
« Par Dex, dist Charlemaignes, tot issi bien l’otroi.
En l’ile Nostre Dame entre lo sablonoi
Iert demain la bataille que prisse ert à belloi. »
Renaus de Montalbain s’an va vers sa maisson.
Avec lui vont si frere et tuit si compaignon,
Et si fil ammedui, li nobile baron,
D’autre part s’en alerent li dui enfant Faucon,
Avec alx lor lignage don il i ot foisson.
Tant tindrent bel ostel, n’est se merveille non.
Mais Renaus lo tint tel, à la fiere raisson,
De ci an Pampelune maint jor en parla on.
Par tote la cité en ala li renon,
Et dit li uns à l’autre : « Molt est Renaus preudom.
Ja [enfaut] que il ait, ne fera se bien non.[6]
Honi seront enfin li dui enfant Forcon. »
Quant Renaus ot mangié à son ostel en pais,
Don sailli de la table errament d’un eslais ;
Les esches demanda comme contes palais,