Lendemain par matin revint la sainte gloire,
Et li saint cors s’esmut, devant ala son oirre.
Ne cité dont n’i viengne maladez à planté.
Telx i vient à potence et à bordon ferré
Qui s’en va toz haitiez et toz plains de santé.
Mont fu grans li apors qui i fu aporté.
Le moustier Notre Dame où il est arestez,
En fu toz de novel richement atornez ;
Et saichiez bien de voir et si est vérité,
Que li bons arcevesques qui tant a de bonté,
Li clers et li chanoine, li provoire ordonné,
Ont toz diz en la ville o le cor sejorné
Qu’ains ne fu li charez par nus d’eus remuez.
Le vis ont descovert, ce dit l’autorité,
Savoir ce par nul homme seroit ja avisé
Qui son non li deïst et de quel terre est nez ;
Mais onques n’an vint nus qu’an sceüt verité.
Mont en est l’arcevesque dolanz et abomez
Quant nus ne vient avent qui sceüt deviser
Le nom de ce cor saint et de quel terre est nez,
Car ce il le sceüt, ce dit en vérité,
Volantiers le feïst en fiertre d’or poser ;
Car notre Sire fait por lui miracle assez,
Car i fait sois oïr et muanz aparler
Et fievrez et enfilez et contraiz relever.
Entor le cor a ciergez tote nuit alumé,
A grant honnor le servent, si le font bien garder ;
Saichiez il font que saigez, si com m’orez conter,
Et notre sire Diex lor vot guerredonner,
Car en ice termine que durent devier,
Les fit il avec lui en son ciel coronner.
Signors, or escoutez, que Diex vous soit aidans,
Ce fu à Penthecoste, une feste joiant,
Que li .iii. fiz Aymon erent à Montau[ban],
Avec eux lor neveus, mont estoient dolans
Por amor de Regnaut dont ne scevent neant,
Et qui d’eus se parti issi tres povrement.
Adonc parla Richars qui ot grant maltalant.
« Signors, ce dit li dus, oiez mon loement.
Saichez, le dolosor ne vous vaut pas grantment,
Mais montons le matin sens nul arestement
Et prions Damedieu le pere onipotant
