« Helas ! che dist Alars, cheüe est ma ponée,
Quant [je voi ci mourir la rien qu’ai] tant amée.
Gardez moi mes biax frerez, sainte Vierge honnerée.
Se jou chi remains seus, ch’est male destinée.
Or avera li [roys] sa guerre definée.
Mais par ichel Seignor qui fist chiel et rousée,
Je ne remanrai vis ». Lors courut à s’espée,
Del fuerre le sacha, moult bien fu amourée.
Ja [se la fust el cuer] parmi le cors boutée,
Quant ses freres Guichars li a des puings ostée.
« Frere, che dist Guichars, folie avez pensée.
Bien y recouverrons ains que past l’avesprée.
Chertez se il sont mort, n’i a mestier chelée.
Après m’ochirrai jou sans nule demourée.
Ja dame Dix me doint que m’ame soit sauvée,
Se jou n’en ai Kallon la teste tronchonnée ;
Tout .iii. li courrons sus en Franche la loée.
Encor en ert des cors mainte ame dessevrée ».
Tant ont li .iii. baron lor grant duel demené
Que Renaus esperi, s’a .i. souspir geté.
« Seignor frere, dist il, trop par avez plouré.
Laissiez ester le cri, ne vaut .i. ail pelé.
Mais proiez dame Diu, le roy de maïsté,
Que à mengier nous doint, se il li vient à gré,
Et vengance nous doint de Kallon l’aduré
Que tout che nous a fait par sa grant cruauté. »
Renaus est revenus, grant joie en ont mené
Chis sires les avoit qui le monde a formé.
Or est estés venus, et li yvers passés.
Après avoir volé les trésors du roi à Orléans, Maugis ose y repasser avec ses cousins : singulier artifice auquel il recourt pour réparer cette imprudence : B. f. 26, recto B ; répondant à Fils Aymon, 3678-3691.
Vont s’en li fil Aimon, ne s’aseürent mie.
viii.c. [chevaliers ot en la lor] compaignie,
Et Maugis li courtois qui les caiele et guie.
Il trespasserent Gonche, si ont Franche guerpie ;
