Quant ot li [boins] ermitez que les barons s’en vont,
De la pité qu’il ot, de pité (sic) se confont.
Renaus l’en merchia de Diu qui fist le mont.
Li baron s’en tournirent, demourée n’i font.
Enfressi que au vespre, toute jour erré ont.
El bos se herbegierent où autier sont li mont.
Au matin se leverent, apareillié se sont.
En leur chemin entrerent que nule paor n’ont,
Et vont droit à Tresmoine où à mengier aront ;
Asses aront chevaus et quanques il vaurront.
Ihesus Cris les conduie qui forma tout le mont,
Endroit l’avesprement, ainsi que vous disons,
Entrerent en la ville où il sejourneront,
Jamaiz pour Kallemaine nul jour n’en partiront.
Che fu en un mardi encontre l’anuitier
Que li .iiii. baron qui tant font à prisier
Entrerent à Tresmoine qu’il ont à justichier.
Grant joie ot li evesques quant il l’oï nonchier.
A l’encontre lor va, ne s’i vaut atargier.
Quant il vit les barons, qui tant sont à prisier,
Et la franche ducoise sur Baiart le legier,
Bien set li frans evesques que il [ont] encombrier.
Renaut le fil Aimon est alez embrachier.
Plus de .vii. fois le baise par moult grant amistiés.
« E Diex ! dist li evesques, toi doi je merchier ;
Quant à moi est venus mon seignor droiturier.
Baron, dist li evesques, estez sain et haitié ? »
« Oïl, chou dist li dus, s’eüssons à mengier. »
Quant [l’evesques] l’oï, si prist à larmoier.
La viande commanda as queus apareillier.
Et li keu l’apareillent de gré et volontiers.
Li vesquez les conduit ens ou palais plenier.
Grant feste font au duc que il ont forment chier.
Par Tresmoine sonnerent les clokes au moustier.
La nouvelle s’espart et avant et arrier
Que Renaus est venus, li fiex Aimon le fier.
Dame Diu en merchient bourgois et chevalier
Quant dez mains Kallemaine les laissa repairier.
Renaud et ses frères satisfont largement leur appétit, puis on va dormir dans des lits.
El palais s’endormirent qui estoit poins à flour,
Jusques à l’endemain que il virent le jour,
