Le texte de cette page a été corrigé et est conforme au fac-similé.
BALLADES
SUR PLUSIEURS SUJETS.
BALLADE l.
Orléans contre Garancières.
Je, qui suis Dieu des amoureux,
Prince de joyeuse plaisance,
À toutes celles et à ceulx
Qui sont de mon obéissance,
Requier qu’à toute leur puissance
Me viengnent aidier et servir.
Pour l’outrecuidance punir
D’aucuns qui, par leur janglerie,
Veulent, par force, conquérir
Des grans biens de ma seigneurie.
Car Garanciere, l’un d’entr’eulx.
Si dit en sa folle vantance,
Pour faire le chevalereux,
Qu’avant yer, par sa grant vaillance,
Luy et son cueur, d’une aliance,
Furent devant Beauté courir.
Je ne luy vy pas, sans faillir.
Mais croy qu’il soit en resverie.
Car si près n’oseroit venir
Des grans biens de ma seigneurie.
Il dit qu’il est tant douloreux,
Et qu’il est mort sans recouvrance ;
