J’ai mon esperance fermée
Qu’en tel Dame ne peut faillir
Pitié, mais elle est enfermée
Et laisse dangier m’assaillir.
Et s’el’ voit ma vertu faillir
Pour bien aimer, el’ s’en sauldra
Hors sa demeure, et tard saillir.
Et mon bien souffrir me vaudra.
Ostez-vous hors de ce propos,
Car tant plus vous vous y tiendrez
Moins vous aurez joie et repos
Et jamais à bout n’en viendrez.
Quant à espoir vous attendrez,
Vous en trouverez abestis,
Et en la fin vous apprendrez
Qu’espérance paist les chetifs.
Vous direz ce que vous voudrez,
Et du pouvoir avez assez !
Mais ja espoir ne m’en touldrez,
Par qui j’ai tant de maux passez.
Car quant nature a enchassez
En vous des biens à tel effors
El’ ne les a pas amassez
Pour en mettre pitié dehors.
