Page:Chrétien de Troyes - Cligès, 1921.djvu/135

Amant ne sevent que il font,
Qant li uns de l’autre se cuevre.
En amors a mout greveuse oevre
Et mout torne a confondemant ;
Qui ne comance hardemant
A poinne an puet venir a chief.
L’en dit que il n’i a si grief
Au trespasser come le suel.
D’amors andoctriner vos vuel,
Car bien voi qu’amors vos afole ;
Por ce vos vuel metre a escole,
Et gardez ne m’an celez rien,
Qu’aparceüe m’an sui bien
As contenances de chascun
Que de.ii. cuers avez fet un.
Ja vers moi ne vos an covrez !
De ce trop folemant ovrez
Que chascuns son panser ne dit,
Qu’au celer li uns l’autre ocit :
D’amors omecide serez.
Or vos lo que ja ne querez
Force ne volanté d’amor.
Par mariage et par enor
Vos antreaconpaigniez ansanble ;
Ensi porra, si com moi sanble,
Vostre amors longuemant durer.
Je vos os bien asseürer,
Se vos en avez boen corage,
J’asanblerai le mariage. »
Qant la reïne ot dit son buen,
Alixandres respont le suen :
« Dame, fet il, je ne m’escus
De rien que vos me metez sus,
Einz otroi bien ce que vos dites.
Ja d’Amor ne quier estre quites,
Que toz jorz n’i aie m’antante.