Page:Chrétien de Troyes - Cligès, 1921.djvu/144

Alys et Clygés anbedui
En firent duel si com il durent ;
Mes de duel feire se recrurent :
Mauvés est diax a maintenir,
Car nus biens n’an puet avenir.
A neant est li diax venuz,
Et l’empereres s’est tenuz
Lonc tans aprés de fame prandre,
Car a leauté voloit tandre ;
Mes il n’a cort an tot le monde
Qui de mauvés consoil soit monde.
Par le mauvés consoil qu’il croient
Li baron sovant se desvoient,
Si que leauté ne maintienent.
Sovant a l’empereor vienent
Si home qui consoil li donent ;
De prandre fame le semonent,
Si li enortent et anpressent
Et chascun jor tant l’en apressent
Que par lor grant engresseté
L’ont de sa fiance gité
Et lor voloir lor acreante ;
Mes mout estuet qu’ele soit gente
Et sage et bele et cointe et noble,
Qui dame iert de Costantinoble.
Lors li dïent si conseillier
Qu’il se vuelent apareillier,
S’an iront an tiesche terre
La fille l’empereor querre.
Celi li loent que il praigne,
Car l’empereres d’Alemaigne
Est mout riches et mout puissanz,
Et sa fille tant avenanz
C’onques an la crestianté
N’ot pucele de sa biauté.