Page:Chrétien de Troyes - Cligès, 1921.djvu/147

Por ce que g’en diroie mains,
Ne braz ne cors ne chief ne mains
Ne vuel par parole descrivre,
Car se mil anz avoie a vivre
Et chascun jor doblast mes sans,
Si perdroie gié mon porpans
Einçois que le voir an deïsse.
Bien sai, se m’an antremeïsse
Et tot mon san i anpleasse,
Que tote ma poinne i gastasse,
Et ce seroit poinne gastee.
Tant s’est la pucele hastee
Que ele est el palés venue,
Chief descovert et face nue,
Et la luors de sa biauté
Rant el palés plus grant clarté
Ne feïssent quatre escharboncle.
Devant l’empereor son oncle
Estoit Clygés desafublez.
Un po fu li jorz enublez,
Mes tant estoient bel andui,
Antre la pucele et celui,
C’uns rais de lor biauté issoit,
Don li palés resplandissoit
Tot autresi con li solauz
Qui nest mout clers et mout vermauz.
Por la biauté Clygés retreire
Vuel une description feire,
Don mout sera briés li passages.
En la flor estoit ses aages,
Car ja avoit pres de.xv. anz ;
Mes tant ert biax et avenanz
Que Narcissus, qui desoz l’orme
Vit an la fontainne sa forme,
Si l’ama tant, si com an dit,
Qu’il an fu morz, quant il la vit,
Por tant qu’il ne la pot avoir.