Page:Chrétien de Troyes - Cligès, 1921.djvu/154

S’a panser non et a veillier.
Et ces.ii. choses si la ceingnent
Que mout la plessent et ateingnent,
Qu’ele voit bien tot en apert
A la color que ele pert
Qu’el n’a mie ce qu’ele vialt,
Car moins jeue qu’ele ne sialt
Et moins rit et moins s’esbanoie ;
Mes bien le çoile et bien le noie
Se nus li demande qu’ele a.
Sa mestre avoit non Thessala,
Qui l’avoit norrie en anfance,
Si savoit mout de nigromance.
Por ce fu Thessala clamee
Qu’ele fu de Tessalle nee,
Ou sont feites les deablies,
Anseigniees et establies.
Les fames qui el païs sont
Et charmes et charaies font.
Thessala voit tainte et palie
Celi qu’Amors a en baillie,
Si l’a a consoil aresniee.
« Dex, fet ele, estes vos fesniee,
Ma dolce dameisele chiere,
Qui si avez tainte la chiere ?
Mout me mervoil que vos avez.
Dites le moi, qui le savez,
An quel leu cist max vos tient plus ;
Car se garir vos an doit nus,
A moi vos an poez atandre,
Car bien vos savrai santé randre.
Je sai bien garir d’itropique,
Si sai garir de l’arcetique,
De quinancie et de cuerpous ;
Tant sai d’orines et de pous
Que ja mar avroiz autre mire ;