Page:Chrétien de Troyes - Cligès, 1921.djvu/165

Li Grezois furent an lor trez
Delez Noire Forest es prez,
Et d’autre part logié estoient
Li Sessoignois qui les gueitoient.
Li niés le duc en une angarde
S’an fu alez por prandre garde
S’il porroit feire nul guehaing
Sor ces de la ne nul mehaing.
La ou il ert an son esgart,
Vit Cligés chevalchier soi quart
De vaslez qui se deportoient
Et escuz et lances portoient
Por behorder et por deduire.
Ja lor voldra grever et nuire
Li niés le duc, s’il onques puet.
Atot.ii. conpaignons s’esmuet,
Si se sont mis tot a celee
Lez le bois en une valee,
Si c’onques li Grezois nes virent,
Tant que de la valee issirent
Et que li niés le duc s’adrece,
Si fiert Cligés que il le blece
.I. petitet desus l’eschine.
Cligés se beisse, si s’ancline
Si que la lance outre s’an passe ;
Neporquant.i. petit le quasse.
Qant Cligés sant qu’il est bleciez,
Vers le vaslet s’est adreciez,
Sel vet ferir de tel randon
Que parmi le cors a bandon
Li met la lance, mort le ruie.
Lors se metent tost a la fuie
Li Sesne, qui mout le redotent ;
Parmi la forest se desrotent.
Et Cligés, qui ne set l’aguet,
Hardemant et folie fet,