Page:Chrétien de Troyes - Cligès, 1921.djvu/170

Ne se sont pas d’aus estrangié,
Car duremant broichent et poignent.
D’en.ii. parz les lances anpoignent,
Si s’antracointent et reçoivent,
Si com a tel besoigne doivent.
As premerienes acointances
Percent escuz et froissent lances,
Ronpent cengles, tranchent estriés ;
Vuiz i ont lessiez mainz destriers
De cez qui gisent an la place.
Mes comant que chascuns le face,
Cligés et li dus s’antrevienent,
Les lances esloingniees tienent
Et fierent de si grant vertu
Li uns l’autre sor son escu
Que les lances volent an clices,
Qui forz estoient et feitices.
Cligés ert el cheval adroiz,
En la sele remest toz droiz,
Qu’il n’anbrunche ne ne chancele.
Li dus a vuidiee la sele
Et maugré suen les estriés vuide.
Cligés prandre et mener l’en cuide
Et mout s’an travaille et esforce,
Mes n’est mie soe la force,
Car li Sesne assanblent antor,
Qui li rescoent par estor.
Cligés neporquant sanz mehaing
Part de l’estor atot guehaing ;
Car le destrier au duc an mainne,
Qui plus ert blans que nule lainne
Et valoit a oes un prodome
L’avoir Othevien de Rome ;
Li destriers ert arrabiois.
Mout an sont lié Greu et Tyois