Page:Chrétien de Troyes - Cligès, 1921.djvu/223

Bien feras, ce cuit, mon pleisir,
Et de l’eidier et del teisir.
-Voire, sire, se Dex m’aït ! »
Atant Cligés li conte et dit
La verité tot en apert.
Et quant il li a descovert
Le voir, si con vos le savez,
Car oï dire le m’avez,
Lors dit Jehanz qu’il l’aseüre
De bien feire la sepolture
Au mialz qu’il s’an savra pener ;
Et dit qu’il le voldra mener
Veoir une soe meison,
Et ce c’onques mes ne vit om
Ne fame ne anfant qu’il ait.
Mosterra li ce qu’il a fait,
Se lui plest que avoec lui aille
La ou il oevre et point et taille,
Tot seul a seul, sanz plus de gent.
Lou plus beau leu et lou plus gent
Li mosterra qu’il veïst onques.
Cligés respont : « Alons i donques ! »
Desoz la vile, en.i. destor
Avoit Jehanz feite une tor,
S’i ot par mout grant san pené.
La a Cligés Jehanz mené,
Si le mainne par les estages,
Qui estoient point a ymages,
Beles et bien anluminees.
Les chanbres et les cheminees
Li mostre, et sus et jus le mainne.
Cligés voit la meison sostainne,
Que nus n’i maint ne ne converse.
D’une chanbre en autre traverse,