Page:Chrétien de Troyes - Cligès, 1921.djvu/238

En un blanc paile de Sulie
L’ont les dames ransevelie,
Mes le vis descovert li leissent ;
N’onques la nuit lor criz n’abeissent
Ne ne cessent ne fin ne prenent.
Par tote la vile forssenent
Et haut et bas et povre et riche.
Si sanble que chascuns s’afiche
Qu’il vaintra tot de feire duel
Ne ja nel leissera son vuel.
Tote nuit est li criz mout granz.
L’andemain vint a cort Jehanz,
Et li empereres le mande,
Si li dit et prie et comande :
« Jehan, s’onques feïs boene oevre,
Or i met ton san et descuevre
En une sepolture ovrer,
Tele qu’an ne puisse trover
Si bele ne si bien portreite. »
Et Jehanz, qui l’avoit ja feite,
Dit qu’il en a apareilliee
Une mout bele et bien tailliee ;
Mes onques n’ot antencion
Qu’an i meïst se cors sainz non
Qant il la comança a faire,
Qu’an n’i meïst fors saintuaire.
« L’empererriz i est anclose,
Qu’ele est, ce cuit, mout sainte chose.
-Bien avez dit, fet l’emperere.
Au mostier monseignor saint Pere
Iert anfoïe la defors,
Ou l’en anfuet les autres cors,
Car einçois que ele morist,
Le me pria mout et requist
Que je la la feïsse metre.
Or vos en alez antremetre ;