Page:Chrétien de Troyes - Cligès, 1921.djvu/94

Qui tote lor volanté font
Et de la moie point ne font.
Or sai ge bien de verité
Par cez qui m’ont deserité
Qu’amors de boen seignor perist
Par malvés sergent qu’il norrist.
Qui malvés sergent aconpaigne
Ne puet faillir qu’il ne s’an plaigne,
Quanqu’il aveigne, tost ou tart.
Or vos reparlerai del dart
Qui m’est comandez et bailliez,
Comant il est fez et tailliez.
Mes je dot mout que ge n’i faille,
Car tant en est riche la taille
N’est mervoille se je i fail,
Et si metrai tot mon travail
A dire ce que moi an sanble.
La floiche et li penon ansanble
Sont si pres, qui bien les ravise,
Que il n’i a c’une devise
Ausi con d’une greve estroite ;
Mes ele est si polie et droite
Qu’an la rote sanz demander
N’a rien qui face a amander.
Li penon sont si coloré
Con s’il estoient tuit doré,
Mes doreüre n’i fet rien,
Car li penon, ce savez bien,
Estoient plus luisant ancores.
Li penon sont les treces sores
Que je vi l’autre jor an mer,
C’est li darz qui me fet amer.
Dex, con tres precieus avoir !
Qui tel tresor porroit avoir,
Por qu’avroit an tote sa vie
De nule autre richesce anvie ?