Page:Chrétien de Troyes - Roman de Perceval le Gallois - MS 248.pdf/105

Del graal cui len enservoit
Que toz jorz en son cuer avoit
La parole al prodome sage
Si criem quil n’i ait domage
Porce que jai oi retraire
Quansi se puet len trop raire taire
Con trop parler a la foiéé
Ou bien len prainge ou mal len chiéé
Rien ne quiert ne ne demande
Et li sire al vaslet comande
Liave doner et napes traire
Cil le font qui le doivent faire
Et qui acostume lavoient
Li sire et li dame lavoient
Lor mains diave atempree
Et dui vaslet ont aportee
Une table lee dyvoire
Issi con tesmoïgne lestoire
Ele estoit tote dune piece
Devant le vaslet une piece
Et devant lor seignor le tindrent
Tant que dui altre vaslet vindrent
Qui aportoient.ii. eschaces
Li fust en ot moult bones graces
Dont les eschaces faites furent
Que les pieces toz jorz endurent
Donc furent eles debenus
De ？ fust a cui ja ne ber nus
Que ja porrisse ne quil arde
De cez.ii. choses na il garde