Page:Chrétien de Troyes - Roman de Perceval le Gallois - MS 248.pdf/108

Li vaslez qui nel ot apris
Et li prosdom dist biax amis
Tens est de colchier mes hënuit
Ge men irai ne vos enuit
Laienz en mes chambres gesir
Et quant vos vendra a plaisir
Vos vos recolcheroiz ca hors
Ge nai nul pooir de mon cors
Si covendra que len men port
Quatre serjanz delivre et fort
Maintenant de la chambre issent
La coute as.iiii. cors saisissent
Qui el lit estendue estoi
Sor quoi li prosdom se gisoit
O lui vaslet qui le servirent
Et quanque mestier fu li firent
Quant lui plot si le deschaucierent
Et desvestirent et colchierent
As blans dras de liez de lin
Et il dormi jusqual matin
Que laube del jor fu crevéé
Et la mesniéé fu levéé
Si lestut par lui seul lever
Que quil li deust grever
Des quil voit que faire lestuet
Si se lieve que mielz ne puet
Et chauce sanz aie atendre
Et puis revait ses armes prendre
Quant il ot bien arme ses manbres
Si sen vait hors par luis des chambres