ui petit seme petit quielt
Qui auques recoillir vielt
En tel leu sa semence espande
Que fruit a cent doble li rande ;
Car en terre qui rien ne valt,
Bone semence seche et falt.
Crestiens seme et fait semence
d’un bon romanz quil comence
Et si seme en si bon leu
Quil ne puet estre sanz grant preu
Quil le fait por le plus prodome
Qui soit enlempire de rome
C est li cuens felipe de Flandres
Qui valt mielz ne fist alixandres
Cil que len dit qui tant fu buens
Mais je prouerai que li cuens
Valt mielz que cil ne fist assez
Car cil ot enlui amassez
Toz les vices et toz les maus
Dont li cuens est mondes et saux
Li cuens est tels quil nescoute
Vilein gap ne parole estoute
Et s’il ot dire mal daltrui
Qui que ce soit ce poise lui
Li cuens aime droite iostise
Et leaute et seinte eglise
Et tote vileinie het
S est plus larges qun ne set
Quil done selonc levangile
Sanz ypocrise et sanz guile
Page:Chrétien de Troyes - Roman de Perceval le Gallois - MS 248.pdf/3
Cette page a été validée par deux contributeurs.
248
![](http://upload.wikimedia.org/wikipedia/commons/thumb/7/79/Chr%C3%A9tien_de_Troyes_-_Roman_de_Perceval_le_Gallois_-_MS_248.pdf/page3-983px-Chr%C3%A9tien_de_Troyes_-_Roman_de_Perceval_le_Gallois_-_MS_248.pdf.jpg)