Page:Chrétien de Troyes - Roman de Perceval le Gallois - MS 248.pdf/55

Li prozdom ot que rien ni valt
Proiere atant li iorz sen falt
Si vont couchier sanz plus de plait
Que li lit. estoient ja fait
Li prosdom matin sen leva
Au lit al vaslet en ala
La ou il le trova gisant
Si li list porte un presant
Chemise. et braies de cheinsil
Et chauces teintes en breisil
Et cote dun drap. de soie inde
Qui fu teissuz et faiz en inde
Porce que vestire li feist
Li envoia et se li dist
Amis cez dras. que ci vééz
Vestiroiz si vos me creez
Et li vaslez respont biaus sire
Soplest vos portiez mielz dire
Li drap que ma mere me fist
Dont ne valent il mielz que cist
Et vos volez que ges veste
Vaslet. foi que doi ma reste
Fait li prosdom ainz valent pis
Vos me deistes biaus amis
Quant ge vos amenai caienz
Que vos toz mes comandemenz
Feriez. et ge si ferai
Fait li vaslez ja ne serai
En contre vos de nule chose
El dras vestir. plus ne repose