Fui a Betune, ou j’ai esté sovent.
La me sosvint de gent de male guise
Ki m’ont mis sus mençoigne a entïent :
Ke j’ai chanté des dames laidement ;
Mais il n’ont pas ma chançon bien aprise :
Je n’en chantai fors d’une solement,
Qui bien forfist ke venjance en fu prise.
Si n’est pas drois ke on me desconfise,
Et vous dirai bien par raison coment :
Car se on fait d’un fort larron justice,
Doit il desplaire as loiaus de noient ?
Nenil, par Diu ! qui raison i entent ;
Mais la raisons est si arriere mise
Ke çou c’on doit loer blasment la gent
Et loent çou que nus autres ne prise.
Dame, lonc tans ai fait vostre service,
La merci Deu ! c’or n’en ai mais talant,
Que m’est ou cuer une autre amor assise
Que me requiert et alume et esprant
Et me semont d’amer si hatement
C’an li n’en a ne orgoil me faintise ;
Et jel ferai, ne puet estre autrement,
Si me metrai dou tout an sa franchise.
A la millor del roiaume de France,
Voire del mont, ai mon cuer atorné,