Page:D'Orbigny - Le Conte de Floire et Blanchefleur, 1288.djvu/11

par nuit oscure veoit on
une liue tot environ.
En la tombe ot quatre tuiaus
as quatre cors, bien fais et biaus,
es queus li quatre vent feroient
cascuns ausi com il ventoient.
Quant li vens les enfans toucoit,
l'un baisoit l'autre et acoloit,
si disoient par ingremance
trestout lor bon et lor enfance.
Ce dist Flores a Blanceflor :
"Baisiés moi, bele, par amor."
Blanceflor respont en baisant :
"Je vos aim plus que riens vivant."
Tant com li vent les atouvoient
et li enfant s'entrebaisoient,
et quant il laissent le venter,
dont se reposent de parler.
Tant doucement s'entresgardoient
que c'ert avis que il rioient.
Au cief desus de cel tomblel
avoit planté un arbrisel ;
molt estoit biaus et bien foillis
et de flors ert adés garnis ;
totes sont cargies les brances
et les flors noveles et blances.
Cius arbres a a non benus ;
ja un seul point n'en ardra fus.
As piés par devers le solel
avoit un turabim vermel ;
soussiel nen a plus bele cose,
plus ert bele que flors de rose.
A destre part ot un cresmier
et a senestre un balsamier ;
n'ert en cest siecle tele odour
qui vausist cele de la flour,
car de l'un basmes decouroit
et de l'autre cresmes caoit.
Cil qui les quatre arbres planterent
trestos les dieus en conjurerent,
au planter tel conjur i firent
que toustans cil arbre florirent.
Bien sont flouri cil arbrisel,
tous tans i cantent mil oisel.
La oïssiés tel melodie,
onques tele ne fu oïe.
Tel melodie demenoient
li oisel qui illoec cantoient,
se damoisiaus les escoutast
ne pucele, por qu'ele amast,
de ces dous cans que il oïssent
d'amors si tres fort espresissent
qu'il se courussent embracier,
l'uns l'autre doucement baisier.
Se nules gens les escoutaissent
qui ja d'amor ne se penaissent,
de la douçor que il oïssent
isnellepas s'en endormissent.
Entre ces quatre arbres seoit
cele tombe qui faite estoit.
Onques mais por une pucele
ne cuit que fust faite tant bele.