Page:D'Orbigny - Le Conte de Floire et Blanchefleur, 1288.djvu/8

Quant mes fius morte le sara,
en peu de tans l'oublïera."
La roïne li respondi :
"Sire, fait el, por Dieu, merchi !
A cest port a molt marceans
de Babiloine, bien manans.
Au port le fai mener et vendre,
grant avoir pués illoeques prendre.
Cil l'en menront, car molt est bele ;
ja n'orrés mais de li novele,
si en serons delivre bien
sans estre homecide de rien."
Li rois a grant paine l'otroie.
Par un borgois illoec l'envoie
qui de marcié estoit molt sages
et sot parler de mains langages.
Ne le fist pas par covoitise
vendre li rois en nule guise ;
mius amast il sa mort avoir
que ne fesist cent mars d'avoir :
le pecié crient, por çou le lait.
Li marceans au port s'en vait
et a teus offre la pucele
qui l'acatent, car molt ert bele [...],
trente mars d'or et vint d'argent,
et vint pailes de Bonivent,
et vint mantiaus vairs osterins,
et vint bliaus indes porprins,
et une ciere coupe d'or
qui fu emblee du tresor
au rice empereour de Rome,
ainc a plus ciere ne but home.
A grant mervelle fu bien faite
et molt fu soutiument portraite
par menue neeleüre ;
Vulcans le fist, s'i mist sa cure.
El hanap ot paint environ
Troies et le rice doignon,
et com li Griu dehors l'assaillent,
com au mur par grant aïr maillent,
et com cil dedens se deffendent,
quariaus et peus agus lor rendent.
En l'eur aprés fu painte Helaine,
comment Paris ses drus l'en maine.
D'un blanc esmail ot fait l'image,
assise en l'or par artimage.
Aprés i est com ses maris
le siut par mer, d'ire maris,
et l'os des Grius com il nagoit
et Agamennon quil menoit.
Ens el covercle de desus,
illoec ert paint comme Venus,
Pallas et Juno ensement
vinrent oïr le jugement
de Paris, car eles troverent
une pume, dont estriverent,