Ceux qui auront esté commis pour porter les charirez, s’en acquitteront promptement pour preuenir les inconueniens qui peuuent arriuer du retardement, particulierement lors qu’il s’agist de la Religion ou des mœurs.
Aux visites des lieux suspects, ou de femmes ou filles qui sont dans le desordre, l’on commettra tousjours deux de la Compagnie.
En toutes affaires importantes & charitez temporelles, seront tousjours pris les aduis & passé à la pluralité.
Le Secretaire aura soin de faire de temps en temps vn rolle des personnes qui cherchent condition, particulièrement du sexe, pour le remettre au souuenir de la Compagnie, & aussi le communiquer à la Charité des Dames afin d’y pouruoir.
Si quelqu’vn demande d’estre admis en la Compagnie, il s’adressera à Monsieur le Curé, lequel le proposera à Messieurs les Officiers, pour examiner s’il a les qualitez requises, & après à la Com-
