mener boulets. Il y en a ſans ridelles pour charger poudres à canon, & quaiſſons.
Chariot, ou Char. Carrus & currus en Latin, κάῤῥον en Grec, en Chaldée caron, & en Hebrieu carous. Il y en a de forts ſans ridelles, pour porter corps de canons & couleuerines, & autres auec ridelles pour porter picques & autres munitions.
le cvr. Ie me ſuis autrefois eſmerueillé comme Catulle au liuret des nopces de Pelée & Thetis, ait appellé vn nauire, chariot.
l’Avt. Il ne s’en faut eſtonner, car auparauant Catulle, Eſchyle & Euripide autheurs Grecs en ont vſé de meſme. Que direz vous donc de ce chariot à voiles du Prince Maurice, lequel chargé de vingt-huict perſonnes, à fait en deux heures quatorze lieuës de Hollande, le long du bord & plage de la mer, depuis Scheueringe iuſques à Pettem.
le cvr. On le peut bien donc appeller vn nauire ſur terre ?
l’Avt. Comme le nauire cy-deſſus, vn chariot ſur mer.