Encore a-t’il tesmoigné plus de tendresse pour l’un des trois, que pour les deux autres. Saint Jean ne fait point de difficulté de se nommer le Cher & le Favori de son Maistre. Il se glorifie par tout de cette faveur ; & il me semble qu’il en usa avec assez de liberté, lors qu’il s’endormit, dans le sein d’un Maistre si grand & si redoutable. Considerez-le dans le Tableau de la sainte Cene, & voyez comme il repose sa teste negligemment, sur un lieu, où les Seraphins portent leurs regards, avec reverence.
Puis, donc, que l’Autheur et le Consommateur de la Vertu, aussi bien que de la Foy, a eu ses inclinations & ses amitiez, & n’a pas tousjours voulu commander à la Nature ; le Prince ne doit point craindre d’aimer, apres un Exemple de telle authorité, qui luy en donne toute permission ; & par les principes d’une plus sage Philosophie, que n’est celle de Zenon & de Chrysippe, il peut estre sensible, sans qu’on le puisse dire Intemperant.
