Pour vir honeur, pour vaillance hanter,
Oir les bons qui gouvernoient lors
Aprandre d’eulx et estre aux vertus fors,
Mais assez tost après changa li temps,
Qu’avoir a court un pié hors et l’autre ens[1]
Fut le meilleur, et d’y scavoir du hourt[2] ;
Mais au jour d’uy je voy que c’est grant sens
D’avoir deux piez de tous poins hors de court.
Car on y voit perilleus vens venter
Qui tresbuchent et versent les plus fors
Par cas soudain et les font craventer[3],
Perdre et perir sanz plus estre ressors[4]
En un moment, car quant plus ont tresors
Et plus cuident estre haulz et puissans,
Adonc viens tu, Fortune, et tes consens[5],
Qu’en tumant[6] bas prangnent grant cop et lourt.
Dont, quant a moy, je pas ne me repens[7]
D’avoir .ii. piez de tous poins hors de court.
Petiz bas lieux sont trop moins a doubter ;
Car tant n’y a dangers ne desconforts
Ne telz perilz comme de soy bouter
Es haulz clochers que les granz vens font tors.
Maintes gens sont par trop hault monter mors,
Pour ce fait bon ouvrer es pavemens
Et delaissier ces perilleux tourmens
Ou chascun fuit par convoitise et court,
Dont mieulx vaulsist a maint, si com je sens,
D’avoir .ii. piez de tous poins hors de court.
Page:Deschamps - Œuvres complètes, tome 6.djvu/25
Apparence
Le texte de cette page a été corrigé et est conforme au fac-similé.