il dit en soy-mesme : « Noz gens ne parleront pas tantost en conseil. » Ce bon homme entre en la chambre où estoit le procureur, le salue en luy disant : « Bon jour, Monsieur ! » si hault, qu'on l'oyoit de toute la maison. Le procureur luy dit encores plus hault : « Dieu vous gard, mon amy ! Que dites-vous ? » Lors ilz entrerent en propos de procès, et se mirent à crier tous deux comme s'ilz eussent esté en un bois. Quand ilz eurent bien crié, le bon homme prend congé de son procureur et s'en va. De là à quelques jours, voicy retourner ce bon homme, mais ce fut à une heure que par fortune Fouquet estoit allé par ville là où son maistre l'avoit envoyé. Ce bon homme entre, et après avoir salué son procureur, luy demande comment il se portoit ? Il respond qu'il se portoit bien. « Eh ! Monsieur, dit le bon homme, Dieu soit loué ! vous n'estes plus sourd, au moins. Dernierement que je vins icy, il falloit parler bien hault; mais maintenant vous entendez bien, Dieu mercy. » Le procureur fut tout esbahy. « Mais vous, dit il, mon amy, estes vous bien guery de voz oreilles ? C'estoit vous qui estiez sourd. » Le bon homme luy respond qu'il n'en avoit point esté malade et qu'il avoit tousjours bien ouy, la grace à Dieu. Le procureur se souvint bien incontinent que c'estoit des fredaines de Fouquet ; mais il trouva bien dequoy le luy rendre. Car un jour qu'il l'avoit envoyé à la ville, Fouquet ne faillit point à se jetter dedans un jeu de paulme qui n'estoit pas gueres loing de la maison, ainsi qu'il faisoit le plus des fois quand on l'envoyoit quelque part. Dequoy son maistre estoit assez bien adverty. Et mesmes l'y avoit trouvé quelques fois en passant. Sachant bien qu'il y estoit, il envoya dire à un barbier, son compere, qui demeuroit là aupres, qu'il luy fist tenir un beau balay neuf tout prest, et luy fit dire à quoy il en avoit affaire. Quand il sceut que Fouquet pouvoit estre bien eschauffé à testonner la bourre[1], il vint entrer au jeu de paulme, et appelle Fouquet, qui avoit desjà bandé sa part de deux douzaines d'esteufz et jouoit à l'acquit. Quand il le vit ainsi rouge : « Eh mon amy, vous vous gastez, dict il vous en serez malade. Et puis vostre pere s'en prendra à moy. » Et là-dessus, au sortir du jeu
- ↑ Expression proverbiale, signifiant : pousser l'éteuf, balle de paume, faite de bourre étroitement serrée dans une enveloppe de cuir ; éteuf ne vient pas de touffe, comme le dit La Monnoye, mais de l'italien stoffa.
