470 Avant l’apele la meschine ;
al chevalier la fait venir :
bien li purra tut a leisir
mustrer e dire sun curage,
turt li a pru u a damage.
475 Il la salue e ele lui.
En grant esfrei erent amdui.
Il ne l’osot niënt requerre ;
pur ceo qu’il ert d’estrange terre,
aveit poür, s’il li mustrast,
480 qu’el l’enhaïst e esloignast
Mes ki ne mustre s’enferté,
a peine puet aveir santé.
Amurs est plaie dedenz cors,
e si ne piert niënt defors ;
485 ceo est uns mals ki lunges tient,
pur ceo que de nature vient.
[Bl. 143b] Plusur le tienent a gabeis,
si cume cil vilain curteis,
ki jolivent par tut le mund,
490 puis se vantent de ceo que funt ;
n’est pas amurs, einz est folie
e malvaistiez e lecherie.
Ki en puet un leial trover,
mult le deit servir e amer
495 e estre a sun comandement.
471 cheualer ; feit — 472 purrat — 474 tur — 476 effrei — 477 requere — 478 tere — 479 mustrat — 480 que ele ; sesloinat — 482 peot auer — 483 Amur — 485 un mal que — 487 Plusurs — 488 cum — 491 amur — 492 mauueiste — 493 peot ; leal — 494 mut