Cette page a été validée par deux contributeurs.
ÉNIGME IOYEVSE POVR
les bons eſprits.
SONNET.
E ne le veux celer, quand ie me trouue à point
Ie vais voir mon amy, ie le prens, ie l’embraſſe,
Et ſi ſouuent ſon nerf entre mes doigts ie paſſe
Que ie le fais roidir, ne le vouluſt il point.
Apres le voyant preſt, gaillard & bien en point.
Mes deux cuiſſes ſ’ouurant d’vn aſſez large eſpace,
Ie le mets entre-deux & ſi bien ie le place,
Qu’on ne nous diroit qu’vn, tant de pres il me joint.
Alors d’vn maniment fretillard & adextre,
Remuant haut & bas, or à gauche or à dextre,
Entre mille douceurs i’accomplis mon deſir.
Et ſi par fois ſon nerf deuient laſche & ſ’abaiſſe,
Auec deux de mes doigs ſi bien ie le redreſſe,
Que plus qu’auparauant i’en tire du plaiſir.
