Amy Lecteur voicy le dernier des Œuvres du ſieur Henrion Profeſſeur és Mathematiques, contenant les quinze livres des Elements d’Euclide, traduicts en François, avec des Commentaires beaucoup plus amples & faciles, & des figures mieux taillées qu’en toutes les traductions precedentes : auſquels il a adiouſté le livre des Donnez, du meſme Euclide, außi traduict en François ; ce qui n’avoit point encores eſté faict iuſques icy, quoy que l’uſage de ce livre ſoit fort commun par toutes les Mathematiques, & particulièrement en l’Analiſe, ſcience auiourd’huy tant eſtimee & recherchee, & qui a remis en ce temps la Geometrie en son lustre autant qu’elle y fut iamais, auec eſperance d’une perfection beaucoup plus grande. Cét œuvre eſtoit imprimé dés le vivant de l’Autheur : & ſ’il ne l’a publiee, c’est que son intention eſtoit d’y adiouſter le reſte de ce qui ſe trouve des œuvres d’Euclide, ſçavoir l’Optique, & Catoptrique, les Phenomenes, la Muſique, & un fragment du léger & du peſant, toutes leſquelles parties il avoit deſia traduites, comme en font foy les manuſcripts qu’il a laißés, & qui ſont entre les mains de sa veufve : ainſi il diviſoit toutes les œuvres d’Euclide en deux Tomes, deſquels le premier eſtoit celuy-cy, & le dernier devoit contenir ce que nous avons dict maintenant, dont la pre-
