Euclides vixit temporibus Ptolemæi-Lagi, circiter annum 272 ante æram vulgarem ; Archimedes suis in libris sæpe de illo meminit. Euclides a Ptolemæo interrogatus an non esset methodus discende Geometriæ methodo suâ facilior : Non est regia, inquit Euclides, ad Geometriam via. Hæc tantum de Euclide novimus : quâ sit patriâ oriundus ignoratur.
Ante Euclidem permulti floruerunt geometræ. Primus omnium Graecorum, Euclides eorum opera collegit, collecta digessit, et quæ fuerant incondite demonstrata, ea demonstrationibus inconcussis exornavit.
Plurima opera Euclides conscripserat ; ex quibus tredecim libri Elementorum et Data tantum supersunt.
Librorum omnium qui de scientiarum elementis agunt liber perfectissimus semper habita sunt Euclidis Elementa, quæ in omnes omnino linguas fuerunt conversa.
De Elementis Euclidis sic Cardanus : Quorum inconcussa dogmatum firmitas, perfectioque adeo absoluta est, ut nullum opus huic aliud comparare audeas ; quibus fit ut adeo veritatis lux in eo refulgeat, ut soli hi in arduis questionibus videantur posse a vero falsum discernere, qui Euclidem habeant familiarem.
Ait Pemberton se non semel Newtonem audivisse mœrentem quod sese Cartesii aliorumque algebristarum operibus totum dedisset, antequam studuisset Euclidis Elementis, et illa fuisset meditatus.
D. Lagrange quem extinctum luget et diu lugebit Europa, mihi dictitabat Geometriam esse linguam mortuam ; et qui in Euclidis Elementis
