qu’il faisoit de sa pieté, et combien il regrettoit la perte que l’on avoit faite a sa mort. Il en parla de la mesme mamiere a feu M. L’Archevesque de Paris, qui luy en demanda des nouvelles, ayant sceu qu’il l’avoit assisté à la mort. Et quoyque ce qu’il luy rapporta dans la mesme occasion d’une conversation qu’il avoit euë avec m. Pascal dans sa maladie, ayt donné lieu à quelques personnes, qui auroient voulu, s’ils avoient pu, noircir sa memoire et sa reputation, de faire courir le bruit qu’il avoit fait avant que de mourir, une retractation entre les moins de M. le Cure de S.t Estienne : Neantmoins il y a peu de gens à present, qui ne soient entierement desabusez de cette calomnie dont M. Le Cure de S.t Estienne luy mesme, qui est encore vivant, et qui est presentement abbé de S.te Genevieve et General de cet Ordre, pourra detromper tous ceux qui ne le seroient pas encore suffisament, et qui luy en voudront demander l’éclaircissement. Il s’en est deja assez expliqué par avance dans plusieurs lettres qu’il nous a fait l’honneur de nous ecrire sur ce sujet, et que nous avons en nos mains, par lesquelles il declare qu’il n’a jamais dit ni de bouche ni par écrit à qui que ce soit, que m. Pascal se fust retracté, comme un effet cela estoit très faux.
