de la foy, soit pour celles qui regardent la Soumission de l’esprit, soit pour celles qui regardent la prattique dans la Morale, à quoy toute la Religion se termine, et cet amour le portoit à travailler sans cesse à detruire tout ce qui pouvoit s’opposer à ces veritez.
Il avoit une Eloquence naturelle, qui luy donnoit une facilité merveilleuse à dire ce quʼil vouloit ; mais il avoit ajouté à cela des regles dont on ne s’estoit point encore avisé, et dont il se servoit si avantageusement, qu’il estoit maitre de son stile, en sorte que non seulement il disoit tout ce quʼil vouloit, mais il le disoit en la maniere qu’il vouloit, et son discours faisoit l’effet quʼil s’estoit proposé : et cette maniere d’ecrire naturelle, naïve et forte en mesme temps luy estoit si propre et si particuliere, qu’aussitost qu’on vit paroître les lettres au provincial, on vit bien qu’elles estoient deluy, quelque soin quʼil ayt toujours pris de le cacher, mesme à ses proches.
Ce fut dans ce temps là quʼil plût à Dieu de guerir ma fille d’une fistule lachrimale, qui avoit fait un si grand progrés dans trois ans et demy, que le pus sortoit non seulement
