auquel aurions demandé sous quel tiltre estoit la paroisse, quel service il y faisoit combien d’ames de communion il y avoit dans led. lieu sil y avoit point d’huguenot ou heretique, et si tous ses paroissiens avoient faict leur devoir pascal ; lequel nous auroit dict et respondeu que lad. paroisse estoit sous le tiltre de nostre dame ; qu’il y celebroit la saincte messe tous les jours ou soit son secondere sur les six heures de matin, et les dimanches et festes solennelles. Il y celebroit une grande messe sur les neufs heures de matin, et a la pointe du jour tous les dimanches son secondaire et lui quelquefois disoient une basse messe, avec le prosne, et quil administroit les sacremens a ses paroissiens et que tous les lundis non empechés, il disoit ou soit son secondaire une basse messe pour les morts et il executoit de point en point nos ordonnances sinodales ; et que tous les dimanches depuis la Toussains jusques a la pentecoste avant que de chanter les vespres ils y faisoient le cathechisme, qu'il y avoit environ deux cens et dix ames de communion, qu'il n'y avoit point
