Et a moult joli sentement
D’ordener aucune cançon.
Encores l’en mist a raison
Ses varlès qui li dist : « Biau sire,
« Grant temps a ne vous oÿ dire
« Motet, cançon ne virelay. »
Et cilz respont sans nul délai :
« Tu le m’as or ramenteü,
« A tele fin c’un pourveü
« En ai puis .iiii. jours en ça.
« Je n’en fis ne cantai pieça
« Nul qui me pleusist telement.
« Se le vodrai presentement
« Chanter pour nous miex resjoïr. »
— « Et je suis tous près de l’oïr »,
Ce respont Bertoulès, « par m’ame. » f. 35 d
Adont Agamanor entame
Le virelay a clere vois,
Qui fu si fait, a ceste fois.
Ma dame, je vous laissai,
Au departir, quanques j’ai,
Mon coer, mon corps, entirement.
Si le gardés, car loyaument
De vous ja ne l’osterai.
Car ou monde je ne sçay,
Ce vous di je certainnement,
En qui fiance euisse ou ai,
Fors qu’en vous, dame, seulement.
Pour ce a vous je me donnai,
Tel que, tant com je viverai,
