Et la, de par le roy Artu,
Y avoit aucuns chevaliers
Qui festioient volentiers
Pour l’amour de la ditte dame
De la Garde, qui Diex gard l’ame.
Ensi se tinrent celle nuit
En grant joie et en grant deduit,
Et l’endemain trestout le jour.
Trois jours et .iii. nuis lor sejour
Prisent la, en tres grant reviel,
Signeur, dames et damoisiel.
Au quart jour pluiseur s’en partirent
Qui par devers leurs manoirs tirent.
La damoiselle de Montgriès,
Qui ne demoroit pas trop priès,
Mais bien .iii. journées en sus,
Prist congiet, et puis au sourplus f. 52 c
S’en retourna en son paÿs.
Messires Camelz, ce m’est vis,
Sitost qu’il le sceut revenue,
De Camois vint la voie herbue
A Montgriès pour oïr nouvelles.
Florée avoech ses damoiselles
Li fisent grant chiere de bras,
Et li recorderent en tas
Dou dit tournoi la verité,
Et comment on y ot esté
En grant joie et en grant revel.
Dist Camelz : « De tout ce m’est biel,
« Mais dittes moy qui ot le pris ? »
Adont a Florée repris
La parolle et dist : « Sire chiers,
« Le pris en porte uns chevaliers
« Dont je ne cognois pas le nom.
« Mais je li porte tel renom
« C’onques ne vi mieus tournoiant.
Page:Froissart - Méliador, tome 1.djvu/283
Le texte de cette page a été corrigé et est conforme au fac-similé.
203
Méliador
