Comme elle l’avoit ordené.
Sen palefroi a lors donné
A son page, et puis vient avant,
Et se met tout droit au devant
De Melyador qui dormoit.
Si le regarda et bien voit
Qu’il estoit endormis moult fort.
En soy dist : « J’aroie grant tort
« Se soudainnement l’esvilloie ;
« Trop grant desplaisir li feroie.
« Cela ne feroie a nul fuer,
« Mais j’ay or plaisance a mon cuer
« Et raisons si le me conseille
« Que en chantant je le resveille. »
Lors se mist la belle au chanter,
Qui se pooit moult bien vanter f. 58 a
Que vois avoit jolie et douce,
Et ossi moult tres belle bouche
Dont la vois en chantant issoit.
Et c’est bien raison que chi soit
Mis li doulz rondelès avant,
Qui li vint droit la au devant,
Le quel chanta pour resvillier
Courtoisement le chevalier.
Amis, quel[e] part que je soie,
Jamais ne vous oublierai,
Ains vous serai loyal amie
En tout dis par mon sierement,
Car vous m’estes confors et joie,
Vous estes tout le bien que j’ay
Et serés, voir, toute ma vie,
Amis, etc.
