N’est pas en bon point, ce dist elle ;
S’en est triste, c’est bien raison.
Adont l’a mis a question
Pour savoir de li le certain,
Mais celle ne li conte grain
La verité dont li maulz vient,
Qui entours son joli coer tient ;
Mais li dist tout a la reverse.
N’a femme qui o lui converse
A cui elle en die noient.
Si se mourdrist certainnement,
Mais saciés que elle aultre cose
Pour sen honneur faire n’en ose.
e n’est pas cose moult courtoise
Au dit duc et a la ducoise,
Quant elles voient en tel point
Leur fille, qui les nuis nul point
Ne poet dormir ne reposer ;
Et se ne scevent sus gloser,
Ne dont li vient ceste matere. f. 142 c
Saciés, au pere et a la mere
Desplaist forment li ordenance,
Car leur fille tendrete et blance
Voient amenrir de santé.
A celles qui plus l’ont hanté
Demandent tout secretement
De sa vie, mais nullement
Elles n’en scevent mais que dire,
Fors tant qu’elles l’ont veü rire
A le fois et tant dire encor :
« Ha, biau frere Melyador,
« Pour vous reçoi grant penitance !
« Trop mieulz me vausist l’esperance
« A avoir c’avantier avoie,
Page:Froissart - Méliador, tome 2.djvu/297
Le texte de cette page a été corrigé et est conforme au fac-similé.
293
Méliador